Оленка Живкович народзена 2. септембра 1965. року у Вербаше. Основну школу закончела у Руским Керестуре, ґимназию у Сримских Карловцох, напрям орґанизатор културних активносцох, и одслухала два роки на Катедри за руски язик и литературу, теди напрям руски и росийски язик, котру ше єй нє удало закончиц.

Уж у основней школи нїтку ґу писаню, рецитованю и ґлуми обачел учитель Владимир Семан, котри ю унапрямовал же би писала до Пионирскей заградки, а познєйше и до МАК-у, та до Руского слова. Тиж так мала чесц робиц зоз учительом Йовґеном Медєшом, котри ю уведол до швета театралней творчосци, дзе познєйше участвовала у аматерских младежских и у виводзацким ансамблу Аматерского народного театру „Дядя”, сцена у Руским Керестуре.

Активно роби и зоз рецитаторами младшого возросту и на таки способ помага розвиваню мацеринского, руского язика при нових ґенерацийох.

Зоз своїма роботами у основней школи доставала визначни награди, як цо награду Златне пирко Югославиї  за репортажу о теди успишней младей атлетичарки, 1978. року. На општинским конкурсу основних школох достала награду за писню Чом, того истого року. Предлужує писац у МАК-у, а познейше и у Руским слове. Свойо твори обявює у Литературней Фейсбук ґрупи Литература по руски, под своїм меном и под псевдонимом. Твори єй обявйовани и у Литературним слове.

Пише на мацеринским, руским язику, алє и по сербски, та преклада свойо писнї на обидва язики.