САШО ПАЛЄНКАШ народзени 1979. року у Заґребе, а од свойого дзешатого року жиє у Руским Керестуре.

Поезию и прозу на руским язику активно обявює уж 20 роки. Пред тим писал по анґлийски и по сербски. Твори обявйовал у „Литературним слове”, Руским християнским календаре, часописох „Заградка”, „МАК” и „Шветлосц”.

У паперовей форми ма обявену єдну самостойну кнїжку, а його твори ше зявюю у ище даскелїх зборнїкох хтори обявел часопис „МАК”. У електронскей форми, на интернету, ма обявену позберану поезию и прозу, тексти хтори писани за його музични албуми, кратки приповедки и даскельо кнїжки кратшей форми.

Тиж написал и даскельо представи, од хторих два премиєрно виведзени.

Достал припознанє з обласци култури и образованя Општини Кула „Зарї култури”, литературну награду „Мирослав Стрибер” хтору додзелює НВУ „Руске слово”, як и награду за найлєпши драмски текст Руского народного театру „Петро Ризнич Дядя”.

Попри тим же пише, активни є у компонованю и знїманю музики, видео продукциї, як и фотоґрафованю, а уж вецей як трицец роки активни є член Дома култури у Руским Керестуре и то у секцийох фолклору, театру, хора и оркестра.