Же любим литературу найзаслужнєйши мойо родичи хтори од кеди паметам о себе,  з рижнима кнїжками лєм дополньовали нашу фамилийну библиотеку. На мнє було, як сом за хтори наслов дорастал, лєм читац и уживац. Пред тим як цо сом научел читац мац ми приповедала и преприповедовала озда шицки наслови литератури за дзеци написеней по руски як и найкрасши наслови шветовей литератури. Баяко же попри того и я сам мушим мац хробачка у глави хтoри вше гладни цошка читац та вец тото пречитане вше ознова анализовац и на езер способи спатрац алє дзекуюци їм тє тому же од мойого дзецинства обачели тоту мою прихильносц и потримали ю и сцерпезлїво пестовали, я нєшка Мастер професор руского язика и литератури. Же любим теорию литератури найзаслужнєйши мой оцец з хторим зме од малючка “филозофовали” о кнїжкох хтори вон а потим и я пречитали и мойо професоре. Уж тераз покойни професор Владимир Бесерминї ме з тим “длобаньом” по литератури фахово упознал и “заражел” поступнє од основней школи та по конєц Ґимназиї у Руским Керестуре. Лоґично було же сом матурску роботу на концу ґимназиї поробел под його менторством а тема ми була “За ким дзвон дзвонї-роман о шпанскей гражданскей войни”. По якимшик шлїду лоґики, жадаюци буц у живоце тот цо толмачи и вше ознова ше чиря до рижних и чаривних шветох литератури, окреме тей уметнїцкей, уписал сом Катедру за руски язик и литературу на новосадским универзитету. Ту ме дочекал други професор  котрому сом подзековни же знам на иншаки и окремни способ спатрац  литературни дїла, професор доктор Юлиян Тамаш. Вон ме научел спатрац нашу литературу у ширшим шветовим контексту и прешвечел, точнєйше потвердзел же и литература написана на язику на яким шнїєш, на язику на яким ци родичи приповедаю перши приповедки, єднак вредна литература як и шицки, такволани, вельки шветово литератури. Бо квалитет и уметнїцка вредносц як и у шицких других стварох у живоце так и у литератури препознатлїви и припозна ше  кеди теди, без огляду на яки способ є створени, точнєйше, без огляду на яким язику є написани.

            Заш по якейшик лоґики дипломовал сом на литератури з тему “Силвестер Саламон: Писнї у прози и їх новозавитни жридла-посланїци апостола Павла” ментор ми бул професор Тамаш а одцена 10. З тоту диплому запошлєл сом ше до телевизиї Войводини дзе и нєшка робим як редактор. Алє ту нє конєц приповедки о моїм студираню. Я дипломовал по старей системи студираня а на факултету нєодлуга потим уведзена болоньска система и випадло же тота стара диплома нє исте цо и мастер диплома (наприклад, без Мастер дипломи нє мож робиц у школи як професор руского язика!) И нїч, уписал я и тоти мастер студиї по новей системи, попокладал шицки испити зоз просекову одцену 10,00 и мастеровал на тему: “Руска поезия и проза у гранїчних ситуацийох литературних родох” под менторством професора доктора Юлияна Тамаша зоз одцену 10.

Свойо литературни твори обявйовал сом у младежским часопису МАК и Руским Слове. За збирку поезиї Триолоґия подзелєл сом награду Александра Духновича зоз Иваном Медєшом и Наталию Рибовичову 2007. року а 2009. року за свою поезию достал сом и специялну награду  на литературним конкурсу у Польскей.