Description

Кнїжка поезиї и приповедкох Силвестера Д. Макая орґанизована до двох векших цалосцох. Перша цалосц до хторей позберани Макайово писнї писани у остатнїх даскелїх рокох ноши наслов Panta rei, цо би у прекладзе значело Шицко чече, а цалосц од осем приповедкох насловена по єдней з найудатнєйших Миколово слизи. То у началє кнїжка писньох, а приповедки ту уложени пре єдноставну причину же би остали нєзабути и медзи рамиками кнїжки.

Сам наслов поетскей цалосци преноши читачом ключне порученє кнїжки. Час преходзи, шицко чече, живот ше блїжи ґу концу и треба го резимовац и видзиц цо остава за нїм. За Макайом, скулптором, маляром и поетом остава нє мали шлїд. Вон зробел скулптури и портрети велїх визначних Руснацох хтори були учашнїки културного и вирского, значи идентитетского живота нашей националней заєднїци ту на войводянских просторох, як и гумани швет идейох за яки ше закладал автор за хторого можеме повесц же є уметнїк par excellence.

Кед же у кнїжки писньох Одняти од Ступи, часци коцурского хотара обробел на поетски способ здогадованє на цали мали салашарски космос у хторим вироснул, а хтори у медзичаше щезнул, за тоту поетску цалосц мож повесц же у нєй ошпивал швет идейох за яки ше цали свой творчи живот закладал. То швет гуманосци, уметнїцкей творчосци, мира и почитованя чловека без огляду на його национални, вирски и други специфичносци.

Микола Шанта