ОПИС

виривок з рецензиї
Серафина Макаї барз добре позна психолоґию дзецка, школского возросту, його швет, интересованя, мотиви. У тим швеце важну улогу забераю нє лєм мац, оцец, баба, дїдо, шестри, браца и товарише, алє и дзецку мили животинї описани у приповедкох, як цо то Петрово штиґлинци, сучка Тарка, єлень Перо, козички, герлїчки, риби. З тима животинями юнаки приповедкох и писньох рошню, любя их, пестуюци их уча ше одвичательносци. Дзеци у приповедкох и писньох Макайовей вязани и за природу, бо найкрасше ше бавиц вонка под белавим нєбом и цеплим слунком, або на билим, чистим шнїгу. Дзецко себе одмалючка чувствує як часц тей природи, воно ю анализує, стара ше о нєй и ужива у єй богатстве. Приповедки и писнї у тей кнїжки при дзецох виволую чувства любови, праведносци, гуманосци, еколоґийней свидомосци, та прето нєшка, кед часто и сами родичи нє найсиґурнєйши до своєй вредносней системи, тота кнїжка може мац позитивну улогу у розвою їх дзецка.
Микола Шанта