ОПИС

Виривок з рецензиї

Зоз угла розвойного психолоґа, обачуєм же тота кнїжка ясно дефинує и описує страхи хтори ше як цошка цо звичайне зявюю у предшколским возросту и виволуюци су як за дзецко, так и за його родичох. Кнїжка, попри тим, дава точни и ефикасни способи превозиходзеня тих страхох на уровню дзецка, родичох и їх кооперациї. Хасновитосц тей кнїжки нє лєм у директним вплївованю на розвиванє механїзмох зочованя зоз стресом и страхами, алє и у тим же вона дотика вецей рижни розвойно важни домени: афективну вязаносц, визуомоторну координацию, коґнитивни розвой, емоцийни розвой, социялни розвой…

Кнїжка наисце єдинствена, вецейнїсто хасновита як за дзеци, так и за їх родичох.

 Мили родичи, з аспекта фаховца, сцела бим Вам повесц даскельо найважнєйши информациї о тей кнїжки:

 Насампредз, тота кнїжка точне и хасновите средство з помоцу хторого лєгчейше и адекватнєйше одвитуєце на страхи хтори маю Вашо дзеци. Научице же шицко тото през цо преходзице нормалне. Кнїжка понука унапряменє як ше повязац зоз своїм дзецком, як розумиц дзецински способ роздумованя и страх, а же би Вашо активносци були розвойно прилагодзени и интересантни и за Вас и за дзецко.

Першенствено, кнїжка Вам помогнє же бисце ше упущели до борби зоз дзецинскима страхами, алє и превозишли свойо страхи о тим же чи то робице на прави способ. Тота кнїжка вецейнїсто хасновита, бо дава готови задатки и ситуациї за роботу зоз дзецком, отвера комуникацию на различити теми, дава Вам емоцийну потримовку, враца Вам самодовириє и змоцнює одношенє родитель-дзецко. Ви и Вашо дзецко здобудзеце нови механїзми зочованя зоз стресом хтори далєй можеце хасновац у розличних животних ситуацийох.

 Мили дзеци з аспекта фаховца сцела бим Вам повесц даскельо найважнєйши информациї о тей кнїжки:

 Тота кнїжка розуми вашо страхи, нє зменшує их, алє вам понука способи як бисце их ришели. През тоту кнїжку пренайдзеце, або ше здогаднєце шицких способох на хтори можеце ришиц проблем як и людзох хтори вам у тим можу помогнуц. Тота кнїжка ясно дефинує же кажде дзецко способне и ма капацитети же би ше зочело зоз проблемами на хтори наиходзи. Верце єй.

др Нина Бркич Йованович