ОПИС

Виривок з рецензиї

Вецейрочни активизем Саши Палєнкаша ше реализує през музику, драму и литературу и у каждей з тих обласцох уметнїцкого виражованя вон прешвечлїво автентични од самого початку. Своєчасово зоз драмску прозу Белава принцеза дебитовал на конкурсу РНТ Дядя и през часопис Шветлосц, а текст наградзени и сценски успишно реализовани, а сказковиту футуристичну новелу Вселенски корабель обявел як самостойну кнїжку 2020. року.

Тераз пред нами гибридни рукопис у хторим ше нашли його вчасни писнї и приповедки. Його прозни рефлексиї окреме интересантни и прето же у себе маю и наративни етноґрафски елементи, односно препознатлїви и общеприлапени прикмети руского духовного нашлїдства у хторим ше одкриваю фолклорни мотиви през хтори ше препознава и руска национална прешлосц. Вон на основи тих знакох коло драги прейґ хторих водзи своїх юнакох и виписує свойо роздумованя и предпоставени подїї, терашнї наш статус модификує у будучносци. Кажда тота проєкция дїйствує лоґично и тот його футуризем ше барз розликує од проєкцийох даєдних других руских писательох.

Ирина Гарди Ковачевич