Description

Виривок з рецензиї

Богата, змистова, нїжна и маштовита кнїжка праве ошвиженє у рускей литератури за дзеци. Громадка баснох и кратких приповедкох хтори виписани на сказковити способ дзецом одкрию швет и живот живих и нєживих єствох (у приповедки и нєживе може ожиц), за хтори дзеци знаю лєм припатраюци ше на швет коло себе, дзекеди жиюци зоз, або коло нїх, а дзекеди дознаваюци о нїх лєм прейґ кнїжкох, телевизиї, интернета и ридко зоз приповедкох старших.

Аж и гевти дзеци хтори окреме любя животинї и маю богату машту и слух за дробнїци коло себе, науча дацо нове о нїх, дацо цо им пове же шицко цо постої на жеми, нє лєм людзе и животинї, алє и рошлїни и предмети з хторима ше служа, трепеца з якимшик своїм тирваньом и служа на одредзени способ и чловекови и швету, а и кед нє служа, заш лєм творя швет коло нього богатшим и красшим.

Способ зоз хторим авторка приповеда о тим швету радує нє лєм дзеци, алє и гевтих одроснутих хтори при заглавчку своїх дзецох або унучатох, буду преживйовац стварносц о хторей би иншак нє роздумовали, або голєм нє на таки способ як то роби писателька Оксана Мудри Недич.

Вона швет коло себе видзи як всевкупне єдинство шицких єствох, як и людзох и дзецох, бо лєм дзеци маю так ширцом отворени шерца и чула ґу видимому и нєвидимому.

Ирина Гарди Ковачевич